Euskarak badu bere pisua Euskal Autonomia Erkidegoko ekonomian. Euskararen Balio eta Eragin Ekonomikoa azterlanarekin, euskarak EAEko ekonomiari egiten dion ekarpena aztertu du Eusko Jaurlaritzak. Emaitzak argigarriak dira: Arabako, Bizkaiko eta Gipuzkoako Barne Produktu Gordinaren (BPG) % 4,2 dagokio euskarari, 2.800 milioi euroko ekarpena egiten baitio. Halaber, 56.142 lanpostu daude euskarari lotuak, EAEko lanpostuen % 6,3. Datu esanguratsuak dira, beste jarduera batzuekin alderatuz gero: Hezkuntzak, esaterako, % 5,5eko ekarpena egiten du EAEko BPGn, eta turismoak, % 5,8koa. Siadeco etxeak egin du azterketa, eta zehazki lau sektore aztertu ditu: hizkuntzaren industria, kultura eta hedabideen industria, hezkuntza eta unibertsitate arloko jarduerak eta herri administrazioa. Ikerketaren bidez, hainbat hizkuntzaren aurrean sorturiko aurreiritziak eraitsi nahi izan dituzte. “Ikerketaren emaitzak agerian jartzen du, argi eta garbi, euskarak gure gizartearen sare ekonomikoan duen garrantzia. Halaber, lagungarria da euskararen eragingarritasun eta baliagarritasun ekonomikoa zalantzan jartzen edo ukatzen duen aurreiritzia desegiteko” azaldu du Patxi Baztarrika Hizkuntza Politikarako sailburuordeak.