Etzazuaka
Akauzazte
Arto Artian 2015
Lan erraldoia plazaratu du Akauzazte Azkoitiko taldeak Etzazuaka honekin (ez begiratu hiztegian, taldearen izena alderantziz irakurrita baino ez da). Erraldoia luzea, zabala eta sakona delako: hamabost abesti, nahiko luzeak gehienak, binilo bikoitzaren lau aldeetan barreiatuta (Iparra, Hegoa, Ekia eta Mendea dira aldeen izenburuak). Erraldoia, erditze prozesua ere luzea eta nekosoa izan delako; lau urtez egindako lanaren emaitza da diskoa, eta 2011tik 2014ra grabatutako abestiak biltzen ditu. Erraldoia, batez ere, edukiagatik: aspalditik ez genuen topatzen disko bakar batean hainbeste ideia, hainbeste proposamen interesgarri, hainbeste soinu eta iradokizun. Ez gara ari Euskal Herrian argitaraturiko diskoez soilki. Ez nuke jakingo definitzen: musika industrialaz hitz egin genezake, tribalismoaz, psikodeliaz, trantzea eragin dezaketen doinu hipnotiko eta haluzinatuez... hurbilduko ginateke hemen dagoenera, baina ez genuke oso-osorik atzemango. Ez da entzunaldi samurra;harrapatzen bazaitu, ordea, ez zaitu askatuko.
Gotzon Hermosilla