AEKren III. Didaktika Topaketa, probetxuzkoa
AEK-ko didaktika arduradun Benito Fizek balorazio ona egin du ekainaren 7an Donostiako apaiztegian egin zen Didaktika Topaketaren III. edizioaren inguruan.
80 AEKidek hartu zuten parte bertan (22 didaktikari tartean), “lanerako motibatuta eta ilusioz”, Fizen hitzetan: “AEKn jende asko ari gara lanean, eta leku desberdinetan; hortaz, 80 lagun batu ahal izatea, irakasle lanaz hitz egiteko, aukera ona da eta jendeak eskertu egiten du. Are gehiago, Donostiako seminariotik itsasora begira jarri eta konpainia onean egoteko parada badago”. Hala, Fizek erakundearentzako seinale ontzat du “AEK-ko irakasleek gauzak ikasi, landu eta jorratzeko gogoa” edukitzea. Esperientziak konpartitu zituzten bertan bildutakoek: “Esperientzien berri eman, entzun, komentatu, proposatu...”.
Hiru zatitan egituratu zen Topaketa. Lehenengoan, alde batetik, 37 lagunek Deustuko Unibertsitateko Jone Goirigoltzarriren hitzaldia entzun zuten, Euskaldun berrien auto-pertzepzioa: hiztun legitimoa naiz? izenburua duena. Garatzen ari diren ikerketaren berri eman zuen, aztertzen ari baitira euskaldun berriek euren burua nola ikusten duten euskaldunen artean eta euskaldun modura. Fizen iritziz, “hausnarketa piztu zuen irakasleen artean, ikasleei euskaldun berri edo euskaldun izaterako jauzi hori ematen zelan lagundu pentsatzeko”. Bestetik, 43 lagunek hartu zuten parte Eba Arratibelek prestatu eta Asier Arroitak eskainitako tailerrean. Kontu teknikoak landu zituzten bertan, ikasleei aurkezten zaien materialaren itxuraren eta diseinuaren gainekoak.
Bestalde, lau bilgune proposatu ziren Topaketaren bigarren zatirako, gai edo arlo baten inguruan interesa duen jendeari bere kezkak, balorazioak eta proposamenak adierazteko aukera emateko, taldeka.
Autoikaskuntzari dagokionez, tutoretzak, mintzasaioak eta ikaslearentzako materialak nola antolatu eta ikasleekin nola jokatu aztertu zuten taldean; gehienek baliagarria iritzi zioten esperientziak konpartitzeari.
Azterketen taldean, HABEren azterketak, EGA edo bestelako proben bueltan lan egiten duten irakasleek eta aztertzaileek hartu zuten parte. Hainbat gauzaren artean, azterketek eta probek eskolan eta ikasleengan gero eta eragin handiagoa dutela azpimarratu zen.
Beste talde batean, irakasleek eskola programatzeko eta materialak bilatzeko eta antolatzeko dituzten arazoez jardun zuten, eta, hala, zantzu eta aholku interesgarriak eman zizkieten materiala egiten dutenei.
Ikaslea eta taldeari buruzko gaia lantzeko bilgunean, berriz, hainbat kontu jorratu zituzten: taldeen osaketa, ikasleen eta irakasleen jarrera eta portaera, harremanak, asistentzia...
Azkenik, hirugarren zatian, mintzodromoan, ez zen gai berririk jorratu, baina goizean saio eta talde desberdinetan ibili zen jendea talde txikietan batu zen, entzundakoen eta esandakoen berri elkarri emateko. Hori bai, kafe baten bueltan. Nola hobeto?