Aurtengo udazkenean da egitekoa bigarren Euskaraldia, hizkuntza ohiturak aldatzea xede duen ariketa soziala. Azaroaren 20tik abenduaren 4ra egingo denaren aurretik, baina, hizkuntza ohituretan etxean eragiteko ekimena burutu du Euskaraldiak: Etxealditik Euskaraldira. Konfinamendu egoera aintzat hartuta, apirilaren 20tik maiatzaren 3ra egin da, bi helburu nagusirekin: etxekoekin eta etxean gure hizkuntza ohituren gainean pentsaraztea, batetik; eta, bestetik, euskararen erabilera sustatzea, horretarako bitartekoak eskainita. Hala, ekimenak iraun bitartean (aldizkaria inprentan zegoenean oraindik martxan zen), hainbat ekintza garatu dituzte, hiru fasetan, tokian tokiko Euskaraldia batzordeen bitartez: hausnarketa fasea, lehenik; hizkuntza ohiturak aldatzeko edota haiei eusteko proposamenen hedapena, ondoren; eta, azkenik, ekimenari amaiera emateko ekintza, maiatzaren 3an. Hausnarketa eta praktika bultzatu ez ezik, herritarrei digitalki zein fisikoki parte hartzeko bideak zabaldu ere egin dizkie ekimenak, non, besteak beste, AEK-k parte hartu duen. Udazkeneko hitzordua ostertzean, balio beza, konfinamenduan ala konfinamendurik gabe, maiatzaren 3tik aurrera ere etxeko hizkuntza ohiturak aldatzeko!