Egun luzeetarako, hiru harribitxi…
Goizean, zuhaitz eder baten gerizpean, arkatza eskuan, adi-adi irakurtzekoa da Asun Garikanok itzulitako William Faulknerren Hotsa eta ardaila. Idazle amerikarraren idazkera maite dugunontzat plazera euskaraz irakurtzea.
Arratsalde sargori batean, itsasertzean dastatzeko limonadaren zaporea dario Miren Agur Meaberen Errepidea liburuari (Euskadi Saria, 2011n). Txorien eta alabaren ikuspuntu hunkigarriek gozatzen dute ihesi bizi diren ama-alaben istorio honen garraztasuna. Bizitzaren gazi-gozoak, ipuin eder batean.
Azkenik, enbatak gogor jotzen duen iluntzeetan, aterpe bakartiren batean hausnartzekoa Felipe Juaristiren Begi-ikarak (Kritika Saria, 2004an). Hiria iluntzen duen ekaitz beltzaren bortizkeriak min ematen dio lurrari; min, guri. Behin eta berriz irakurtzeko poemak, atertu eta zeruan enaren hegaldi zoroa agertu bitartean dastatzekoak.