Aurten irakurritako liburuetatik, honako hauek aukeratu ditut:
Aurrena, Kafkaren Metamorfosia (Erein, 2016, A. Garikanoren itzulpena); gaztetan irakurri duenari barrenean betiko geratzen zaion kontakizun zirraragarria, noizean behin berriz irakurtzeko premia sentiarazten duten horietakoa.
Bigarrena, Juan Luis Zabalaren Txistu eta biok (Algaida, 2016); argumentu ia parodiko baten zirrikituetatik gogoeta interesgarri asko eskaintzen dituen eleberria, asko umore apur batekin emanak. Kulturaren munduko txepelkeria handiustekoekin nazkatuta dagoenak atsegin handiz irakurriko du.
Amaitzeko, poesia pixka bat: Juan Kruz Igerabideren Lainoa janez (Erein, 2015); gure poetarik onenetako baten azken oparia, hizkuntzaren konden-tsazioa tanta gardenetan isuria, barreneko zoko guztietaraino bustitzen zaituen euri-lanbroa, inoiz atertuko ez duen itxaropenarekin uzten zaituena.